Bi sedhezaran kes ên ku bi wesayîtên cenazeyên hersê jinên kurd re dimeşiyan gihîştin Qada Batikentê. Cenaze bi dirûşmên "Hevalên rojê nemir in” û "Şehîd Namirin hatin pêşwazîkirin. Ji ber qelebalixê, qada merasîmê veguherî mehşerê.

Ji ber merasîma cenazeyên sê jinên siyasetmedar ên kurd ku li paytexta Fransa Parîsê hatibûn qetilkirin Sakîne Cansiz, Fîdan Dogan û Leyla Şaylemez ku li Qada Batikenta Amedê tê lidarxistin, li bakurê Kurdistanê hema bêje jiyan rawestiya. Li bajar hemû dikan û kargeh hatin girtin û dibistan hatin boykotkirin. Cenazeyên her sê jinên kurd li Qada Batikentê bi dirûşman hatin pêşwazîkirin.

Ji ber piraniya girseyê kincên reş li xwe kiribûn û paçên spî avêtibûn stûyê xwe, qad hema bêje bi reş û spî xemilî. Bi sedhezaran Kurdistanî wêneyên Cansiz, Dogan û Şaylemez vekirin û pankarta "Şer dike, Azad dibe, Azad dibe xweşik dibe, xweşik dibe tê hezkirin” hildan. Bi taybet jinên kurd di mîtîngê de dovîzên li ser "Em hemû Sakîne ne”, "Em hemû Leyla ne” û "Em hemû Fîdan in” hilgirtin.

Her wiha di merasîma ku bi wêneyên her sê jinên kurd hatin xemilandin de pankartên wekî "Em ê êşa li Roboskê, êşa li Parîsê, veguherînin hêrsê, hêrsê veguherînin serkefitnê” balê kişand û tevî wêneyên mezin ên Endamê Konseya Leşkerî yê HPG’ê Ertem Karabulut (Nûman Amed) ê ku li Licê di encama operasyonekê de jiyana xwe ji dest da, alên KCK, PKK û PAJK’ê hatin vekirin. Her wiha qad bi wêneyên Rêberê Gelê Kurd Abdullah Ocalan hat xemilandin.

Herikîna ber bi qadê ve berdewam kir û bi sedhezaran kesên ku tevî cenazeyan hatin qadê ji aliyê sedhezaran ve bi dirûşman hatin pêşwazîkirin. Di merasîmê de Hevserokên KCD’ê Aysel Tugluk û Ahmet Turk, Hevserokên BDP’ê Selahattîn Demîrtaş û Gultan Kişanak, hemû parlamenterên BDP’ê, nûnerên HDK, HDP, rêxistnên sivîl, partiyên siyasî yên kurd, nûnerên partiyên çepgir ên Tirkiyeyê, rewşenbîr û gelek kesayet tevli merasîmê bûn.

Darbestên hersê jinên kurd ku bi alên PKK’ê hatibûn xemilandin, jinan danîn ser milên xwe li ser platformê danîn. Jin li derdora darbestan bûn xelek. Bi sedhezaran bi yek dengî dirûşma "Şehîd Namirin” "Hevalên Rojê Nemir in”, qêriyan. Her wiha stranên kurdî yên "Çerxa Şoreşê” û "Sê Jinên Azad” hatin guhdarkirin.