Di belgeyeke ku Wikileaksê weşandiye de tê diyar kirin ku Serokê
Herêma Federal a Kurdistanê Mesûd Berzanî soz daye dîplomatê tirk da ku
desthilatdariya Kerkûkê bi tirkmenan re parve bike
06/12/2010
Li gorî belgeyên veşarî yên Wezareta Karên Derve ya DYA’yê ku
malpera Wikileaks weşandin, tê angaştin ku di hevdîtina Serokê Herêma
Federal a Kurdistan Mesûd Barzanî û sefîrê tirk yê Iraqê Murat Ozçelîk
hatiye qebûlkirin ku nabe ku Kerkûk bi temamî bibe bajarê kurdan û
pêşniyara komîsyona hevbeş a bi tirkmenan re hatiye kirin. Rojnameya
El Ekber a li Lubnanê weşanê dike, nivîsên sefîrên DYA yên li 8 welatên
ereb ên ji aliyê Wikileaksê ve hatin weşandin, belav kir. Li gorî
dokumanên ji Bexdayê çûne bo Washingtonê, rêveberiya Hewlêrê di mijara
Kerkûkê de tawîz daye Tirkiyeyê. Li gorî belgeya bi dîroka 24’ê
çileya 2010’ê, balyozê tirk Murat Ozçelîk agahiyên hevdîtinên xwe yên bi
Serokê Herêma Federal a Kurdistan Mesud Barzanî û rayedarên kurd re, bi
dîplomatên DYA’yê re parve dike. Tê diyarkirin ku di hevdîtinê de
Barzanî ji bo pirsgirêka Kerkûkê pêşniyara "avakirina komîsyona
lihevkirina kurd-tirkmen” ji bo Ozçelîk kiriye û xwestiye balyozê tirk
serokatiya lingê tirkmen ê komusyonê bike.
BARZANÎ SOZ DAYE! Tê
angaştin ku di hevdîtinên di navbera Ozçelîk, Wezîrê Navxweyî yê Tirk
Beşîr Atalay û Wezîrê Navxweyî yê Herêma Federal a Kurdistanê Sîncarî de
pêk hat yekemîn car e ku kurd ‘vê yekê qebûlkirine ku temamiya Kerkûkê
nekeve bin desthilatiya rêveberiya kurdan.’ Her wiha tê diyarkirin ku
Ozçelîk pêşniyara Tirkiyeyê ya derbarê statûya taybet a Kerkûkê ji
rêveberiya kurdan ragihandiye û di pêşniyarê de tê gotin ku bila Kerkûk
bi hevkariya rêveberiya Herêma Federal a Kurdistanê û Iraqê bi awayek
xweser bê rêvebirin, ger wiha bikin, ev yek wê bi qasî 10 salan bi vî
awayî bê rêvebirin. Balkêş e ku ji bo Barzanî ji soza xwe
venegere, Ozçelîk di vê mijarê de diyar dike ku divê Tirkiye alîkariyê
bide. BEYRUD - ANF