Kongreya
Civaka Demokratîk piştî 4'emîn Lijneya Giştî ya Asayî ku biryara
"Avakirina Xweseriya Demokratîk" dabû niha jî ji aliyê Komîsyona
Rêxistinkirinê ya KCD'ê ve biryara berfirehkirina Meclisên Bajar hate
girtin
SEFERBERIYA XWESERIYÊ
Komîsyonên KCD'ê di çerçoveya avakirina Xweseriya Demokratîk de xebatên
xwe berfireh kir. Di vê çerçoveyê de Komîsyona Rêxistinkirinê ya KCD'ê
di navbera 2-3'ê kanûnê de li Amedê civîn pêk anî. KCD'ê piştî civînê li
ser encama civînê daxuyaniyeke nivîskî weşand. Di daxuyaniyê de hate
gotin ku, pêvajoya siyasî hatiye nirxandin û tespîta "Bi giştî
şaristaniya bi dewlet, taybetî jî krîza kapîtalîst a modern her ku diçe
kûr dibe."
LI PEY RANTA SIYASÎ NE
Di encamnameyê de helwesta AKP'ê hate nirxandin û wiha hate gotin:
"Derket holê ku AKP hemû karê xwe yê polîtîk û dîplomatîk ji bo
tasfiyekirina azadiya gelê kurd dimeşîne. Hemû dewlemendiyên Tirkiyeyê
yên ser axê û bin axê ji bo polîtîkayên xwe ji hêzên navneteweyî re
pêşkêş dike. AKP di hundir de desteserkirina desthilatdariyê temam
kiriye û di hilbijartinên 2011'an de jî dê vê pêvajoyê temam bike. Di vê
çerçoveyê de fersendên ji bo ku di serî de pirsgirêka kurd û hemû
pirsgirêkên civakî çareser bibe derketine holê bi awayekî pragmatîk
bikartîne û pûç dike" Di encamnameyê de tê diyar kirin ku AKP biryara
bêçalakîtiyê ya PKK'ê jî vegerandiye ranta siyasî û armanca wê bê
bandorkirina siyasete kurd e.
Di berdewama encamnameyê de li ser hevdîtîn Rêberê Gelê Kurd Abdullah
Ocalan û rayedarên PKK'ê hate rawestandin û wiha hate gotin: "Ligel
hêviyên ku di encama hevdîtina rayedarên dewletê û Rêberê Gelê Kurd
Abdullah Ocalan, derketibûn holê hêj tu gav nehatine avêtin. AKP, li
aliyekê wekî ku pirsgirêka kurd çareser dike tevdigere li aliyê din jî
pêşniyarên birêz Abdullah Ocalan û gelê kurd li ber çavan nagire, mijûl
dike û di polîtîkaya tasfiyekirinê de israr dike."
XWEREXNEKIRIN…
Di encamnameyê de li ser encama civinê de KCD'ê li ser mijara avakirina
Xweseriya Demokratîk de xwerexneya xwe da û wiha dom kir; "Komîsyona me
ya rêxistinkirinê ji bo avakirina Xweseriya Demokratîk pêywîra ku ketiye
ser milê wê bi cih neaniye. Li hemberî polîtîkayên qîrkirinê yên
leşkerî, siyasî û çandî ji bo ku xweseriya demokratîk bikeve nava
jiyaneke xebateke têrî nehatiye kirin. Şewazekî şûna avakirina civakeke
demokratîk, xebatên demî hatine meşandin. Civîna me ev mijar bi
berfirehî destgirtina û rexne kirine."
MECLISÊN BAJARAN
KCD'ê biryar da ku heta dawiya çileyê 2011'an li hemû bajaran Meclisên
Bajêr bêne avakirin. KCD'ê di daxuyaniya xwe de wiha domand; "Di
çerçoveya xebatên hiqûqî yên ewlehiya gel ên Xweseriya Demokratîk de êdî
pêwîste bi her awayî bê berfirehkirin û sererastkirin. Li dijî fihûş,
tiryakê û qirkirina çandî bi vî awayî ji bo avakirina ewlehî û azadiya
gelê kurd divê xebat bê berfirehkirin. Wekî encam, em bang li hemû
derdorên demokratîk, hemû hêzên siyasî û sivîl ên bi bingeha welatparêzî
girêdayî, dikin ku li hemberî polîtîkayên mijulkirinê, parçekirinê û
tastifyekirinê di têkoşîna aştî û azadiyê de ji bo xebatên avakirina
Xweseriya Demokratîk li cem gelê kurd cih bigirin."